Հատուկ սննդակարգ շաքարախտ ունեցողների համար

Հատուկ սննդակարգ շաքարախտ ունեցողների համար

Եթե դուք շաքարախտ ունեք, ապա Ձեզ անհրաժեշտ է հատուկ սննդակարգ: Շաքարախտի դիետան իրականում այլ բան չէ, քան պարզապես առողջ սնվելու կարգ է, որը կօգնի ձեզ կարգավորել արյան մեջ շաքարի քանակությունը: Ահա ձեզ օգնություն այն սկսելու համար՝ ճաշացանկի պլանավորումից մինչև փոխանակման ցանկեր և ածխաջրերի հաշվում:

Սահմանում

Շաքարախտի դիետա նշանակում է պարզապես օգտագործել ամենաառողջարար սննդամթերքը չափավոր քանակությամբ և սնվել կանոնավոր:

Շաքարախտի դիետան առողջ սնվելու պլան է, որը բնականաբար հարուստ է սննդարար նյութերով, քիչ ճարպերով ու կալորիաներով: Հիմնական էլեմենտները մրգերն են, բանջարեղենը և ամբողջական հացահատիկային կուլտուրաները: Փաստորեն, շաքարախտի դիետան լավագույն սննդակարգն է բոլորի համար:

Նպատակը

Եթե ունեք շաքարախտ կամ նախաշաքարախտ, ձեր բժիշկը հավանաբար խորհուրդ կտա, որ դուք այցելեք դիետոլոգի՝առողջ սննդակարգ մշակելու համար: Սննդակարգը կօգնի ձեզ վերահսկել արյան մեջ շաքարի քանակը, ձեր քաշը և սրտային հիվանդությունների հետ կապված ռիսկային գործոնները, ինչպիսիք են արյան բարձր ճնշումը և դրանում առկա ճարպերի քանակությունը:

Երբ դուք ուտում եք ավելորդ կալորիաներ և ճարպեր, ձեր օրգանիզմն արձագանքում է դրան արյան մեջ գլյուկոզայի քանակի անցանկալի մեծացմամբ: Դուք կարող եք արյան գլյուկոզայի մակարդակը անվտանգ չափաքանակով պահել՝ նախապատվություն տալով առողջարար սննդի և սնվելու սովորություններին:

Երկրորդ տեսակի շաքարախտ ունեցող շատ մարդկանց համար քաշի կորուստը նույնպես կարող է հեշտացնել արյան գլյուկոզայի վերահսկումը և կարող է ապահովել առողջության համար բազմաթիվ առավելություններ: Եթե քաշի կորստի կարիք ունեք, շաքարախտի դիետան հնարավորություն է տալիս ապահով հասնել ձեր նպատակին՝ կազմակերպված, սննդարար սննդակարգով:

Դիետայի մանրամասները

Շաքարախտի դիետայի հիմքում ընկած է օրական երեք անգամյա սննդի ընդունումը կանոնավոր ժամերին: Սա օգնում է ձեր օրգանիզմին ավելի լավ յուրացնելու արտադրված կամ դեղորայքի միջոցով ստացած ինսուլինը:

Առաջարկվող սննդատեսակներ

Հաշվեք ձեր կալորիաներն այդ սննդարար մթերքներով.

  •  Առողջարար ածխաջրեր

Մարսման ընթացքում շաքարը (պարզ ածխաջրերը) և օսլան (բարդ ածխաջրերը) արյան մեջ վերածվում են գլյուկոզայի: Նախապատվություն տվեք  ամենաառողջարար ածխաջրերին. միրգ, բանջարեղեն, ամբողջական հացահատիկային բույսեր, լոբազգիներ (լոբի, ոլոռ և ոսպ) և ցածր յուղայնության կաթնամթերք:

  • Բջջանյութով հարուստ մթերքներ

Դիետիկ բջջանյութը ներառում է բոլոր տեսակի բուսական մթերքները, որոնք օրգանիզմը չի կարող մարսել կամ յուրացնել: Բջջանյութը չափավորում է օրգանիզմի մարսողությունը և օգնում է վերահսկելու արյան մեջ շաքարի մակարդակը: Բջջանյութով հարուստ մթերքներն են մրգերը, ընկույզը, լոբազգիները (լոբի, ոլոռ և ոսպ), ամբողջական հացահատիկային բույսերից ստացված ալյուրը և ցորենի թեփը:

  • Ձուկ

Այն շատ օգտակար է սրտի համար: Ձուկ կերեք շաբաթական առնվազն երկու անգամ: Այն կարող է հրաշալիորեն փոխարինել յուղոտ մսին: Օրինակ՝ ձողաձուկը, թյունոսը և տափաձուկն ավելի քիչ ճարպ, հագեցած ճարպ ու խոլեստերին են պարունակում, քան տավարի միսն ու թռչնամիսը: Սաղմոնը, սկումբրիան, թյունոսը, սարդինն ու կապտաձուկը հարուստ են օմեգա 3 ճարպային թթուներով, որը բարերար է ազդում սրտի առողջության վրա՝ նվազեցնելով արյան մեջ ճարպի քանակը, որոնք կոչվում են տրիգլիցերիդներ:

Խուսափեք տապակած ձկից և այն ձկնատեսակներից, որոնք շատ սնդիկ են պարունակում, ինչպես՝պսակաձուկը, սղոցաձուկը, սկումբրիան:

  • «Լավ» ճարպեր

Մթերքները, որոնք պարունակում են մոնոչհագեցած և պոլիչհագեցած ճարպեր կարող են նպաստել նվազեցնելու խոլեստերինի մակարդակը: Դրանք են ավոկադոն, նուշը, պեկան ընկույզը, հնդկական ընկույզը, ձիթապտուղը և կանոլայի, ձիթապտղի ու գետնանուշի ձեթը: Բայց մի չարաշահեք դրանք, քանի որ բոլոր տեսակի յուղերը բարձր կալորիականություն ունեն:

Անցանկալի մթերքներ

Շաքարախտը մեծացնում է սրտային հիվանդությունների ու կաթվածի ռիսկը՝ արագացնելով զարկերակների խցանումն ու կարծրացումը: Այն սննդամթերքները, որոնք պարունակում են հետևյալ նյութերը, կարող են վատ ազդեցություն թողնել ձեր սրտի համար առողջարար սննդակարգի վրա:

  • Հագեցած ճարպեր

Բարձր յուղայնության կաթնամթերքը և կենդանական ծագման սպիտակուցները, ինչպես՝ տավարի միսը, նրբերշիկը և խոզապուխտը, պարունակում են հագեցած ճարպեր:

  • Տրանս ճարպեր

Այսպիսի ճարպեր պարունակում են վերամշակված խորտիկները, թխվածքները, տարատեսակ մարգարինները: Բացառեք այս մթերքները:

  • Խոլեստերին

 Խոլեստերինի աղբյուրներ են բարձր յուղայնության կաթնամթերքը և կենդանական սպիտակուցները, ձվի դեղնուցը, լյարդը և այլ օրգանների միսը: Սահմանափակվեք օրական 200 միլիգրամ խոլեստերինով:

  • Աղ

Սահմանափակվեք օրական ավելի քիչ քան 2300 միլիգրամ աղի քանակությամբ: Սակայն, եթե ունեք նաև հիպերտոնիա, պետք է ավելի քիչ քանակությամբ աղ օգտագործեք, քան օրական 1500 միլիգրամն է:

Արդյունքը

Առողջ սննդակարգի որդեգրումը լավագույն ճանապարհն է արյան մեջ գլյուկոզայի մակարդակը վերահսկելու և շաքարախտի բարդացումից խուսափելու համար: Եվ, եթե քաշից ազատվելու կարիք ունեք, կարող եք համարել այն ձեր նպատակներից մեկը:

Բացի շաքարախտի դեմ պայքարից, շաքարախտի դիետան նաև այլ առավելություններ է առաջարկում: Քանի որ շաքարախտի դիետան մեծ քանակությամբ մրգեր, բանջարեղեն ու բջջանյութ է պարունակում, դրան հետևելով նվազում են սրտանոթային հիվանդությունների և քաղցկեղի որոշ տեսակների հետ կապված ռիսկերը: Իսկ ցածր յուղայնության կաթնամթերքը կարող է կրճատել ոսկրային ցածր զանգվածի ռիսկը:

Ռիսկեր

Շաքարախտի դեպքում շատ կարևոր է համագործակցել բժշկի և դիետոլոգի հետ ձեզ համար սննդակարգ մշակելու նպատակով: Օգտագործեք առողջարար սննդամթերքներ, վերահսկեք ձեր չափաբաժինը և սնվեք ռեժիմով արյան մեջ գլյուկոզայի քանակը հսկողության տակ պահելու համար: Եթե խախտեք ձեզ համար նախատեսված դիետան, ի հայտ կգա արյան մեջ շաքարի մակարդակների տատանումների և ավելի լուրջ բարդությունների ռիսկը: