Արդյոք պետք է հեռացնել էնդոմետրիումի եւ արգանդի վզիկի պոլիպները

Արդյոք պետք է հեռացնել էնդոմետրիումի եւ արգանդի վզիկի պոլիպները

12225

Պոլիպոզը հիվանդություն է, որի ժամանակ արգանդի լորձաթաղանթին եւ ցերվիկալ խողովակում առաջանում են պոլիպներ, որոնք բարորակ գոյացություններ են, ունեն «մարմին» եւ «ոտք», որոնցով կառչում են արգանդի պատին: Տեսականորեն էնդոմետրիումի պոլիպոզ կարող է ծագել ցանկացած տարիքում, բայց գլխավորապես պոլիպներ գոյանում են հասուն (35-50 տարեկան) եւ ծեր տարիքում: Այն մասին, թե ինչպիսին են լինում պոլիպները, որքանով են վտանգավոր եւ պետք է արդյոք դրանք հեռացնել, NEWS.am Medicine-ի թղթակցին պատմեց «Աստղիկ» բժշկական կենտրոնի մանկաբարձական-գինեկոլոգիական կլինիկայի ղեկավար Արման Նազինյանը:

Պոլիպների ի՞նչ տեսակներ կան

Էնդեմետրիումի եւ ցերվիկալ խողովակի պոլիպները, ըստ կազմության կառուցվածքի, ընդունված է բաժանել մի քանի տեսակի.

. գեղձային` բաղկացած ստրոմներից եւ գեղձերից,

. գեղձա-ֆիբրոզային պոլիպներ` բաղկացած գլխավորապես շարակցական հյուսվածքից եւ մասամբ նաեւ գեղձային հյուսվածքից,

. ֆիբրոզային պոլիպներ` բաղկացած միայն շարակցական հյուսվածքից,

. ադենոմատոզ պոլիպներ. դրանք այսպես կոչված «նախաքաղցկեղային» պոլիպներն են, որոնք հիմնականում բաղկացած են գեղձային էպիթելից, բայց դրա հետ մեկտեղ ունենում են ատիպիկ բջիջներ: Վերարտադրողական տարիքի կանանց մոտ հաճախ հանդիպում են գեղձային կառուցվածքով պոլիպներ, իսկ հասուն տարիքի կանանց մոտ հաճախ լինում են ֆիբրոզ եւ ադենոմատոզ պոլիպներ: Գեղձաֆիբրոզ պոլիպները հատուկ են տարիքային բոլոր խմբերին: Ինչ վերաբերում է պոլիպների չափերին, դրանք սովորաբար լինում են 0,2-0,3 մմ.-ից մինչեւ 2-2,5 սմ: Ամենամեծ պոլիպները, որոնց հանդիպել են «Աստղիկ» բժշական կենտրոնի մասնագետները, եղել են մոտ 3 սանտիմետր:

Ի՞նչ խնդիրներ կարող են ծագել պոլիպների պատճառով

Պոլիպները համարվում են բարորակ գոյացություններ, սակայն դա չի նշանակում, որ բացարձակ անվտանգ են: Ինչպես նշեց մասնագետը, որոշ դեպքերում պոլիպները կարող են հանգեցնել դաշտանային ցիկլի խանգարման եւ անպտղության: Երբեմն դրանք կարող են «ֆիզիկապես» խոչընդոտել կնոջ հղիանալուն, հատկապես եթե դրանք մեծ են, զբաղեցնում են մեծ տարածք արգանդի խոռոչում եւ փակում են ցերկիվալ խողովակը: Բուժկենտրոնի որոշ հիվանդների հաջողվել է հղիանալ պոլիպները հեռացնելուց հետո: Բացի այդ, վտանգ կա, որ որոշ պոլիպներ (ավելի հաճախ` ադենոմատոզ) կարող են վերաճել էնդոմետրիումի քաղցկեղի: Եվ հենց այդ պատճառով խորհուրդ չի տրվում դրանց համարել աննշան խնդիր եւ անուշադրության մատնել:

Պոլիպոզի ախտանիշները

Շատ հաճախ պոլիպոզի կլինիկական դրսեւորումները բացակայում են, հատկապես երբ պոլիպի կամ պոլիպների չափերը փոքր են. այդ դեպքում դրանք հայտնաբերվում են միայն գերձայնային հետազոտությամբ: Պոլիպները կարող են իրենց զգացնել տալ ներքոնշյալ ախտանշանների դեպքում.

. դաշտանային ցիկլի խանգարում,

. միջդաշտանային նվազ մածուցիկ արյունային արտադրություն, որը կապ չունի մենստրուացիայի հետ,

. շատ առատ դաշտան` մենորագիա, երիտասարդ կանանց մոտ,

. դաշտանադադարի շրջանում գտնվող կանանց մոտ` արյունային արտադրություն,

. կծկանման ցավեր որովայնի ստորին հատվածում, որոնք սովորաբար սաստկանում են սեռական ակտի ժամանակ,

. «կոնտակտային» արյունահոսություն` սեռական ուղիներից արտադրություն սեքսից կամ գինեկոլոգիական զննումից հետո,

. անպտղություն վերարտադրողական տարիքի կնանց մոտ:

Ինչպե՞ս են ախտորոշում պոլիպները

Էնդոմետրիումի եւ արգանդի վզիկի պոլիպները մեծ մասամբ կարելի է հայտնաբերել գերձայնային հետազոտությամբ: Քանի որ պոլիպները հաճախ զգացնել չեն տալիս իրենց, բոլոր կանանց խորհուրդ է տրվում տարին մեկ անգամ գնալ զննման գինեկոլոգի մոտ եւ անցնել փոքր կոնքի օրգանների ԳՁՀ:

Եթե ԳՁՀ-ի ընթացքում նկատվի պոլիպ, մասնագետը կորոշի, թե ինչ պետք է անել հետագայում:

Արդյոք պե՞տք է հեռացնել պոլիպները

Բժիշկ Արման Նազինյանի կարծիքով` պոլիպներն անպայման պետք է հեռացվեն, եւ ապա ուղարկվեն հյուսվածքաբանական հետազոտության, որը ցույց կտա պոլիպի չարորակ կամ բարորակ բնույթը կամ կա արդյոք կրկնության եւ էնդոմետրիումի քաղցկեղի վտանգ: Ըստ հյուսվածքաբանական հետազոտության արդյունքների` մասնագետը կկարողանա որոշել` հիվանդին հարկավո՞ր է հետագա բուժում, թե՞բավարար էր պոլիպի հեռացումը:

Ինչպես նշեց բժիշկ Նազինյանը, «Աստղիկ» բժշկական կենտրոնում պոլիպները հիմնականում հեռացնում են հիստերորեզեկտոսկոպի միջոցով, որը թույլ է տալիս տեսնել ամբողջ ընթացքը եւ հեռացնել միայն պոլիպը` չվնասելով արգանդի լորձաթաղանթը: Հիստերորեզեկտոսկոպը, ինչպես նշեց մասնագետը, սովորաբար բացասաբար չի ազդում կնոջ վերարտադրողական ֆունկցիայի վրա: Միջամտությունից հետո դաշտանային ցիկլը արագորեն վերականգնվում է , եւ կինը կարող է հղիանալ: Ավելին, եթե կնոջը չէր հաջողվում հղիանալ հենց պոլիպի պատճառով, ապա մայրանալու նրա հնարավորությունը այդպիսի միջամտությունից հետո մեծանում է:

NEWS.am Medicine